danny 2009-9-26 20:26
12星座一腳踏兩船的原因
★白羊座：一腳踏兩船的原因多出於貪新鮮
☆ 初期病徵：戀愛中的白羊戀人對情人可謂無微不至，服侍周到隨傳隨到，一旦開始愛理不理就要留意啦！
☆ 對症下藥：千祈咪發難，反而扮曬出面有人追緊你，等佢緊張嚇！
☆ 末期病徵：對你的態度會衰到爆，呼呼喝喝，最明顯不過就係開始數臭你，尤其在朋友面前，記住收風！
★金牛座：一腳踏兩船的原因係情人太衰而外遇太好
☆ 初期病徵：由超級貼身膏藥由朝到晚搵你，變為成日同自己班朋友去玩，同你一齊時仲好似心事重重咁款。
☆ 對症下藥：對佢好ｄ，成日提住佢對你有幾重要。
☆ 末期病徵：闊佬懶理，唔再主動打畀你，更加唔好講話去街，就算你詐型兼發難渣，佢都係只會敷敷衍衍。
★雙子座：一腳踏兩船的原因係野花野草永遠都係咁吸引
☆ 初期病徵：忽然好多新鮮話題，但又唔係開中你嗰樣，例如冇端端係咁同你講攀石又講話毅行者好好玩。
☆ 對症下藥：搵多ｄ新鮮話題或者活動吸引返佢注意。
☆ 末期病徵：你唔搵佢，佢絕對唔會主動打畀你，約十次先勉強出一次，約會時掂下佢都一副唔多願的樣子。
★巨蟹座：一腳踏兩船的原因係新歡比舊愛穩陣
☆ 初期病徵：唔多想你去佢屋企，而且情緒變得更加唔穩定，冇端端打畀你唉聲歎氣，但又冇乜特別事要講。
☆ 對症下藥：咪追問，要用多ｄ阿媽嘅口敏關心佢。
☆ 末期病徵：同你講多句都嫌麻煩，態度明顯衰過以前，仲會有意冇意之間畀你知道出面有第二個等緊佢。
★獅子座：一腳踏兩船的原因係天性難違
☆ 初期病徵：冇乜再花心思攪ｄ浪漫嘅嘢逗你高興，再者係忽然唔再提起身邊某一兩個女仔朋友的近況。
☆ 對症下藥：記住要資源增值武裝自己，佢就唔會捨得低你。
☆ 末期病徵：擺明車馬係有第二個，而且一副情人唔怕多的姿態，等你自己揀仲留唔留低做其中一個嘅後選者。
★處女座：一腳踏兩船的原因係大多認為情人太過坐定「粒綠」；或者舊情舊熾
☆ 初期病徵：成日有意冇意間搵ｄ嘢考驗嚇你，甚至乎專登挑釁你搵交嗌，再睇你做唔做到佢提出的要求。
☆ 對症下藥：快ｄ諗下佢最唔鍾意你ｄ咩，應作出補救同改善。
☆ 末期病徵：同你關係好疏離，似朋友多過似情人，凡事變得斤斤計較，尤其係錢銀，食餐飯都想計返錢。
★天秤座：一腳踏兩船的原因係佢對戀愛的態度 ＝ 渴望 ＋ 難以抵抗
☆ 初期病徵：佢會話朋友少咗聚會，你變咗好少機會見到屬於佢嘅朋友，連帶你朋友的聚會佢都唔多想去。
☆ 對症下藥：出席佢嘅朋友聚會，軟硬兼施睇緊ｄ又要顧全佢面子。
☆ 末期病徵：你會發覺佢心靈同肉體都唔再需要你，唔再講浪漫，對住你變得好現實，最多係講返工ｄ嘢。
★天蠍座：一腳踏兩船的原因係生活苦悶
☆ 初期病徵：無時無刻都會ｃｈｅｃｋ實你嚮邊度，仲安排埋節目畀你，自己就話開ＯＴ或者同同性去街飲嘢。
☆ 對症下藥：忍一忍！睇定ｄ先！
☆ 末期病徵：對你採取半放棄態度，會視你為伴侶，但又唔係情人，你嬲甚至發難，佢都一於好少理一味拖字。
★人馬座：一腳踏兩船的原因係追求新鮮感同刺激
☆ 初期病徵：耐不耐會玩離奇失蹤，之後搵ｄ求其藉口瞞過去；仲會開始成日奉旨點你做嘢唔該都冇一句。
☆ 對症下藥：一定要以退為進，增加自己的內涵，千祈唔好迫佢揀。
☆ 末期病徵：嚮你身上拎著數，一日發你十次老脾，去親街都搵ｄ冇乜人或者冇雷公咁遠嘅地方，驚死撞到熟人咁。
★山羊座：一腳踏兩船的原因係有另一個佢認為更好更合乎條件的對象出現
☆ 初期病徵：忽然對你關懷備，但係又有ｄ閃縮；另一方面成日會提住某個異性的無聊嘢同埋多咗朋友聚會。
☆ 對症下藥：畀多ｄ信心同未來的憧憬佢，加強大家的關連。
☆ 末期病徵：會將全副精神放曬嚮做嘢度，變得死古古同冇嘢講，跟手就會開始玩逃避，冷冷淡淡等你飛。
★水瓶座：一腳踏兩船的原因係撞到個一樣係外星來的人
☆ 初期病徵：兩個人的時候好似畀蟻咬咁，周身唔聚財；仲做好多平時唔會做既嘢，對住你總係欲言又止。
☆ 對症下藥：抱住個平靜的心同佢打開天窗說亮話。
☆ 末期病徵：絕口唔再同你提自己ｄ嘢，少咗見佢屋企人，講嘢嘅態度亦變得客套，連佢ｄ朋友都親密過你。
★雙魚座：一腳踏兩船的原因係要向外尋求戀愛感覺，順便騎牛搵馬
☆ 初期病徵：對住你成日心不在焉，有點鬼鬼祟崇咁，而且變得好謹慎，特別係講大話方面會比平日醒目。
☆ 對症下藥：加強下你嚮佢生命入面的重要性。
☆ 末期病徵：佢會由本來的小魚兒變成大白鯊，對你的態度會有好明顯的分別，講嘢時的態度唔再溫柔。